هذا الحوار اجريته مع الشاعر احمد فؤاد نجم الذى هو بحق نموذج مصرى صادق للانسان المحب لبلده وقد نشرت جزء منه فى احد المجلات الشبابية نظرا لطبيعة الحوار الساخنة ولكن على مدونتى وجدت شعورى يغلبنى بان انشر نص الحوار كاملا هنا 000 ومن هنا بدا الحوار
ــ فى البداية كل نظام له شعرائه المنتمين له ,, وانت لم يكن لك انتمناء لاى نظام ,,لماذا؟
عشان استنى زى ما انا مستنى ,وبعدين هتلاقى كلهم جرشوا, وفيهم من اصبحوا رجال اعمال, او اصدقاء لامراء واولياء عهد, و الحدوتة بالنسبة لهم انتهت مع الشعر...
ــ يعنى نقدر نقول ان حب مصر بالنسبة لك كان اكبر ؟؟
اكيد لان حب مصر اعظم من اى نظام .. اقولك على حاجة, انا شفت فاروق و هو بيمشى و شفت عبد الناصر و السادات وهما بيمشوا فى النهاية من الباقى 00بقى الشعب وانا معاهم.
ــ قلت لأ فى عهد فاروق و عبد الناصر والسادات حتى الان .. لماذا؟
شوفنى ظلمت حد او ادعيت عليه و تعالى حاكمنى.. بيقولك احمد فؤاد نجم اهلاوى ..انا اهلاوى من المدرجات, وده يفرق عن الاهلاوى بتاع المكاتب .. كل واحد برضوا بيشوف مصر من المكان بتاعو, فى فرق بين اللى بيشوفها من الشارع مع الناس ومن يراها من مكتبه!! مصر كدة فى ناس بينتموا لها ميقدروش يهربوا منها ولا هى تهرب منهم وانا معاهم.. انا مصرى من الشارع.
ــ وكم مرة دفعت ثمن كلمة لأ ؟
مفيش ثمن ولا حاجة ..انا قلت لأ وهما معجبهمش .. فاتصرفوا فى حدود اختصاصهم كدولة لها نظامها والعسس بتوعها , وبعدين انا تركت الناس خارج السجن , ودخلت وجدتهم بالداخل , لان السجون مليانة فقراء مفيهاش اغنياء وهما دول اهلى وناسى وانا معاهم.
ــ وهل فى مرة كنت عاوز تقول لأ ومقدرتش؟
محصلش بدليل انى على طول فى السجن .. اسكت ازاى وليه .. امى كانت دايما تقولى اوعى تبلع لسانك.. امى عليها السلام ,هانم مرسى محمد نجم الفلاحة المصرية القمر التى مات زوجها وكانت تصحى الصبح شايلة الفاس عشان تروى الزرع و تؤكل عيالها ..هى دى المصرية التى قال عنها بيرم (منساش مدى الايام فضلك يا فلاحة..هوانم العمارات تعبوا من الراحة)
ــ بماذا تشعر حينما تقول لا وتكون فى محلها ؟
ولا حاجة لانى عارف انى صح ..عشان كدة احذت هذا الطريق .. ولو مكنتش عارف انى الصح مكنتش مشيت فى الطريق ده..لانه طريق صعب و مكلف لكنه فى النهاية هو الصح.
و مع ذكرك للطريق الصعب ما اغرب مرة تم اعتقالك فيها؟
والله منا عارف كلهم زى بعض .. يعنى تخرج من المعتقل ولم تثبت عليك تهمة يخدوك بعد يومين تانى يشوفولك غيرها.. لان قانون الطوارئ الموجود من اوائل الثمانينات يعطى الحق لاى مخبر ان يقبض عليك, ويحطك فى السجن بدون محاكمة!!
ــ نقلب فى مذكراتك..فقبل اعلان النكسة لم تكن مقتنع بالبيانات التى تؤكد سحق الجيش المصرى لاسرائيل..لماذا؟
وطلع صح.. لأنى بشرت بالنكسة قبلها واعتقلت ودفعت الثمن, ولما وقعت النكسة كنت فى قمة الحزن ..لان الذى دفع الثمن هم 30 الف عسكرى ماتوا فى الصحراء, ولم يجدوا احد يدفنهم .. مين دول-العساكر- ولاد الصنايعية والفلاحين ,احنا دفعنا ثمن النكسة مش حد تانى!!
ــ لكن اوصفلى ما قبل اعلان النكسة ..
شفت الناس فرحانين وكنت غير مقتنع , المشكلة ان الشعب المصرى دائما يتهم انه طيب وده مش عيب ..العيب على من يستغل هذه الطيبة ..لاننا شعب طيب الارض ,والحمد لله قدرنا نعدى المحنة وكنت بارفرف من الفرح بعد 73 .
ــ وما الذى احزنك بعد 73؟
السادات قال انا مقدرش احارب امريكا وتلك هى عادتنا فالرئيس ياخذ قرار الحرب منفردا و ياخذ قرار الصلح منفردا !!
ــ وهل بالفعل نحن لا نسطيع مواجهة امريكا ؟
لو كنا نستطيع .. كنا وقفنا فى وجه الظروف التى تواجهنا حاليا من فساد وغيره!!
ــ كيف ترى مصر بعد يوليو 52 ايام ناصر والسادات مرورا بوقتنا الحالى؟
عبد الناصر انا بحبه وممكن اتحيز له .. وهو اتضحك عليه زى ما اتضحك على المصريين الطيبين ..لكن العيب فى عبد الناصر انه حب يجسد مصر بكل مجدها فى شخصه , وده خطا كبير جدا , لان مصر اكبر من اى حد .. اما الان فوقتنا ده خارج المقارنة,يعتبر استثناء لم يحدث لاى شعب من قبل , لا قبل يوليو ولا بعدها ولا حتى ايام اخناتون!!
ــ اذاّ ما مصدر الازمة الان؟
الازمة مصدرها احنا النخبة التى خرجت من الحوارى والغيطان, وفضلوا الجلوس على المقاهى, واعطوا ظهرهم للشعب ونسيوا اصلهم كل حوارهم وجدلهم مع السلطة..ويقولوا الشعب المصرى لا يثور ..فى الاساس انت مقلتش للشعب حاجة عشان يثور..فحوارك كله مع السلطة وفى النهاية المعارضة والحكومة مع بعض مقسمين الادوار بينهم!!
وما رايك فى التعديلات الدستورية الاخيرة؟
انت فاهم انى عارف يعنى ايه تعديلات دستورية من الاساس ,هذه لعبة جديدة بين المعارضة والحكومة ,تمثيلية وادوارها موزعة عشان يشغلوا بها الناس لانهم على شفا الافلاس ,والظرف التاريخى الذى نمر به الان صعب جدا !!
ــ لماذا ؟
لان النظام ميت والشارع ميت والامل فى الشعب انه يصحى من جديد مثل ايام عرابى وسعد زغلول شوف الشعب كام مرة ثار وبيثور على طول من ايام تل العمارنة بيثور وبيرفض,من الاخر الامل فى الشارع.
وما الحل من وجهة نظرك؟
الحل ان الناس متلقيش تاكل عيش ,بعد كدة الواحد هياكل اى شئ يقابله!وهما مجربوش الحكاية دى قبل كدة!
ــ بمناسبة القمة العربية الاخيرة ,, متى سيتوحد العرب على كلمة واحدة ؟
زمان لما ربنا بعث سيدنا محمد بعثه لناس اشد واعنف منا جهالة,لكن فى النهاية نبى مرسل هو من استطاع ان يوحد العرب على كلمة واحدة! اما فى مصر لما ربنا بعث سيدنا لم يبعثه للشعب كاى نبى اخر ولكنه بعثه لفرعون وحاشيته!
ــ نتكلم عن حاجة بتحبها .. ليه اسكندرية بالذات؟
والله منا عارف ..اصلها بلد بيرم وسيد درويش وبعدين دى ملهاش زى ..كل بلد اسافرها سواء فى الوطن العربى او اوروبا اذهب لمدنهاالساحلية عشان اجد مثلها لا اجد,مفيش حد ميحبهاش .. سالت واحد صاحبى ليه مفيش فى جمال اسكندرية؟ قالى عشان لما تشوف قبة الضوء فى السماء فيها ,تلاقيها مختلفة عن اى مدينة فى الدنيا.
ــ كثيرمن الشباب يعتق ان الانتماء للهرم والاثار القديمة هو انتماء لمصر بالرغم من انها حجارة ؟
فى النهاية من بنى الهرم ,ولاد البلد الفراعين وبعظمتهم جعلوا انتمائنا لهم , وعظمتها انها حجارة واحنا بنحبها وياريت احنا نعمل شئ مثلهم .
فى النهاية تقول بيتين يحضروك الان للشباب ؟
سالت شيخ الطريقة مرضيش يجاوب سؤالى
ودارى عنى الحقيقة وفاتنى حاير فى حالى
سالت شيخ الاطبا دوا الجرح اللى بيا
نظرلى نظرة محبة وقال دوايا بايديا
وهنا انتهى الحوار مع احمد فؤاد نجم او الفاجومى والذى تيقنت بعده ان هذا المصرى يستحق بالفعل ان يكون هو الرمز والسلام ختام
